睇到芬蘭國寶 Nokia 俾大美帝的 Microsoft 收購後，心中充滿唏噓。這間曾經是手機界大一哥，在 Feature Phone 年代呼風喚雨，根本沒有人想過她會倒下、甚至被人活剝生吞。最後，她最終都逃不過「乘、住、壞、空」的金科定律，成為歷史。
在 Matrix 電影裡，主角 Neo (Keanu Reeves) 手持那部會「彈」開蓋的 Nokia 8110 ，感覺很型。那部銀色推蓋的 Nokia 8850，是當年代表中產的象徵。我不喜歡 Nokia ，原因是我愛支持低調的廠商，所以當同輩們死買爛買 Nokia 時，我就以 Siemens 的 S25 及 6688 作為我的用機。(Siemens 自 6688 後，其手機事業已走下波、最後成為第一波手機戰被淘汰的廠商之一) 。當年三大廠商主宰手機界 (Nokia、Ericsson及Motorola) ，不斷邀請大明星為他們產品作代言，可見當年手機的黃金時代之盛。現在三大廠商都相繼「收皮」(Motorola 已收歸 Google 企下、Ericsson 已被 Sony 收購，現在 Nokia 更被 Microsoft 陰謀地生吞) ，也見證了時代確是不留人，在這激烈的「智能手機」戰下，由於技術下放，戰況更是激烈，看倌也不妨看看哪間公司會是下一位「收山」者。
好多人都話 Nokia 搞到如斯田地，都係多得佢唔肯轉 Android 。其實，大家又知唔知智能手機的先祖唔係 Apple ，而係 Nokia 呢! 不過我都唔知點解，佢套 Symbian 搞黎搞去都起唔到，但係 Apple 的 Steve Job 一搞就搞起左個 iOS，仲搞到班手機界「老屎忽」死晒， 當然包括 Nokia 啦! 好啦，創唔到先河、咪唯有跟風。好似 Sony、Motorola呀，見勢色唔對，就快快投入 Android 陣型，雖然係呢個環境下搵唔到大錢，但都有啖飯食下，不過 Nokia 就係玩清高，我有我型格。
早前佢位現任 CEO - Stephen Elop 就話因為 Android 已有三叔 (Samsung) 佔先機、iOS 又有蘋果食住，唯有走去 Window 啦... 話就係咁話，不過真心照明月，明月真係會照溝渠。Nokia 一話投入 Microsoft 的 Window 陣營，仲投放大量資源去開發 Lumia 800 時，又當大家都好期待此機有幾勁既時候，另一邊廂的 Microsoft 就大大聲咁話， Lumia 800 係不能 upgrade 至 Window 8 既!!! 噢... 放了一條好大的蕉皮俾 Nokia 呢... 你話呢過係唔係 Microsoft 的「陰毛」呢? 我唔敢講，但係一部功能好好的手機，出了一年多，現在淘寶價只是八百有多人仔，你都唔好話唔慘。
反而，我覺得真係搞到 Nokia 收工、更被 Microsoft 食埋的另一原因，也是 Nokia 不願投入 Android 的主原，就是這位無間道 CEO 啦。原來 Stephen 哥之前係 Microsoft 度打工，之後就過左去 Nokia，仲成為第一位非芬蘭藉的 CEO 添。不過，岩岩遇著剛剛，好多搞到 Nokia 半生不死的決定又係出自呢位 Stephen 哥的手，其實係唔係 Microsoft 設的局呢? 我又只好講句「木宰羊」，不過現任 Microsoft CEO - Steve Ballmer 講，Microsoft 食左 Nokia 啦，而我又行將就... 退休啦，個位總要有人頂架，我就覺得 Stephen 哥就好合適啦! 各位冷眼旁觀者，相信心中有數了。
如此這般， Nokia 就成為了 Microsoft 其中一員啦，佢會唔會改名，變成大美帝咁款，無晒歐洲風格呢? 例如：Micro Nokia，MicNok 呀咁呢? 真係之後先知。不過，Nokia 在我心中，有的一句 Slogan 至今仍未忘，就係「科技以人為本」(Human Technology) 啦，呢句真係係我心中不能磨滅的金句，短短一句，便道出所有科技產品不論你幾貴、幾有型，都最後如果你不能為人解決問題，都是失敗的產品。而我，就係因為呢一句，在選購科技產品時會懶有型咁加多幾分理性才決定是否購買 (當然荷包更是最大的決策者)。我以後會唔會買 Nokia 的產品? 都係再理性 D 諗諗啦，不過我真的考慮去淘寶買部 Lumia 800 作留念之用，話晒都係 Microsoft 給 Nokia 的蕉皮作，對嗎?
沒有留言:
發佈留言